မယုံရင် ပုံပြင်မှတ်တဲ့။ ပုံပြင်ဆိုတာ နားထောင်လို့ကောင်းပေမယ့် မဖြစ်နိုင်တာတွေများလာတဲ့အခါ ဒါမှမဟုတ် သိလာတဲ့အခါ အဲဒီပုံပြင်တွေနဲ့ ကျွန်တော်ငြင်းခုန်တတ်လာပါတယ်။ ရိုးရိုးလေးပါပဲ။
ပုံပြင်(၁)
ဟိုးရှေးရှေးတုန်းက ယုန်နဲ့လိပ်အပြေးပြိုင်ကြသတဲ့။
ကဲ ကြည့်ဦး။ အမြန်နှုန်းဆန့်ကျင်ဘက် ရှိတဲ့ သတ္တ၀ါနှစ်ကောင်နဲ့ စလိုက်တဲ့ ဇာတ်လမ်း။ ရလဒ်ကလည်း ယေဘုယျနဲ့ ဆန့်ကျင်ဘက်ပဲ။ လိပ်က နိုင်သွားသတဲ့။ ယုန်က လမ်းခုလတ်မှာ အိပ်နေလို့ပါတဲ့။ ကျွန်တော်သိပ်သဘောမကျချင်ဘူး။ ယုန်အိပ်ပျော်တဲ့အချိန်ကလည်း လိပ်လိုအကောင် တရွေ့ရွေ့သွားလို့ ပန်းတိုင်ရောက်တဲ့အထိ အိပ်တယ်ဆိုတော့ အင်း ဒီယုန်တော့ အပြေးပြိုင်ပွဲနဲ့ အအိပ်ပြိုင်ပွဲများ မှားလာသလား။ ဒီပုံပြင်ကို version အမျိုးမျိုးနဲ့ ဆန်းသစ်ကြပေမယ့် ရလဒ်ကတော့ လိပ်ပဲနိုင်နေတာပါပဲ။ တောင်ကုန်းပေါ်ကနေ လှိမ့်ချလိုက်တာတို့ အခွံထဲဝင်ပြီး တခြားသတ္တ၀ါတစ်ကောင်ရဲ့ အကူအညီနဲ့ ပန်းတိုင်ရောက်တာတို့ စုံနေတာပါပဲ။ လိပ်တွေရဲ့ ရာဇ၀င်ကတော့ ယုန်နဲ့ပတ်သက်တဲ့ အပြေးပြိုင်ပွဲနဲ့ ပတ်သက်ပြီး ကြီးကျယ်ခမ်းနားသွားတယ်။ ဒါလည်း မဆိုးပါဘူး။ အပြင်မှာမနိုင်ရတောင် ပုံပြင်တွေထဲမှာတော့ နိုင်ရသေးတာပေါ့။ အပြေးပြိုင်ခဲ့ကြတဲ့ ပွဲမှာ စထွက်တဲ့နေရာနဲ့ ပန်းတိုင်အကွာအဝေးကို ခပ်ရေးရေးလေးတောင် သိနိုင်မယ်ဆိုရင် ကျွန်တော် ဒီထက်ပိုငြင်းခုန်မိမယ်ထင်တယ်။ ဒါပေမယ့် ဒီပုံပြင်လေးက သင်ခန်းစာပေးပါတယ်။ ဖြည်းဖြည်းမှန်မှန် အောင်ပွဲခံ တဲ့။ အင်း မဆိုးပါဘူး။ ဒီလိုအောင်ပွဲခံနိုင်တယ်ဆိုတာပြဖို့ ယုန်နဲ့လိပ် ပုံပြင်ထဲမှာ အပြေးပြိုင်လိုက်ရတယ်။ လိပ်ကနိုင်သလို ယုန်က အိပ်လိုက်ရတယ်။ လောင်းကြေးမပါတဲ့ ပြိုင်ပွဲမို့ နှစ်ကောင်လုံး အိုခေ။
ပုံပြင်(၂)
ဟိုးရှေးရှေးတုန်းက ပုရွက်ဆိတ်ဟာ မိုးတွင်းအတွက် အစာစုဆောင်းနေပါသတဲ့။
နှံကောင်ကတော့ ပျော်ပျော်နေပြီး အဲဒီ ပုရွက်ဆိတ်ကို လှောင်ပြောင်နေပါသတဲ့။ ပုရွက်ဆိတ်လေးကတော့ သူ့အလုပ်သူလုပ်ဆောင်နေရင်း မိုးတွင်းကိုရောက်သွားရောတဲ့။ အစာမစုဆောင်းခဲ့တဲ့ နှံကောင်က ပုရွက်ဆိတ်ဆီ အသနားခံ အစာသွားတောင်းပါသတဲ့။ ကဲ ဒီပုံပြင်ရဲ့ ငြင်းခုန်မှုကို အခုစပြီဗျာ။ ရိုးရိုးလေးနော်။ ပုရွက်ဆိတ်စားတဲ့ အစာကို နှံကောင်က စားနိုင်ပါ့မလား။
ပုရွက်ဆိတ်ဟာ Hymenoptera အုပ်စုဝင်တဲ့ ဖော်မစ်ဒီ မျိုးစိတ်ဖြစ်ပါတယ်။ သူစားတဲ့အစာတွေက အချိုဓါတ်များတဲ့ အစားအစာတွေ အသားအစအနတွေ ပိုးမွှားငယ်လေးတွေကိုပါ။
ပုရွက်ဆိတ်ဆီက အစာတောင်းစားတဲ့ နှံကောင်က Acridiidae အုပ်စုဝင်တဲ့ ပိုးမွှားဖြစ်ပြီး သစ်ရွက်စိမ်းတွေ သစ်ပင်ငယ်လေးတွေရဲ့ ပင်စည်တွေကိုသာ ကိုက်ဖြတ်စားသောက်တတ်ပါတယ်။
ကဲ ပုံပြင်ထဲမှာ အစာတောင်းပုံအရဆိုရင်တော့ ပုရွက်ဆိတ်က မဆီမဆိုင် နှံကောင်အတွက်ပါ အစာစုဆောင်းခဲ့တာကို နှံကောင်ကများ မြင်ထားလို့လား။ ဒါမှမဟုတ် ပုရွက်ဆိတ်စားတဲ့အစာတွေကို စားကြည့်ပြီး နှံကောင်တွေရဲ့ life style ကိုပြောင်းမလို့လား။
ဖြစ်နိုင်တာတစ်ခုကို ကျွန်တော်မြင်တာကတော့ ရိုးရိုးလေးပါပဲ။ နှံကောင်စားတဲ့အစားအစာတွေဟာ ပုရွက်ဆိတ်လို စုဆောင်းသိုလှောင်ထားလို့မှ မရတာပဲ။ မရလို့ မလုပ်တာ ရှင်းပါတယ်။ ပုံပြင်ထဲက နှံကောင်ကိုတော့ သနားပါတယ်။ အရွယ်နုနယ်တဲ့ ကလေးတွေရဲ့ ကျောင်းသုံးစာအုပ်ထဲကတစ်ဆင့် ကလေးတွေ ဆရာ ဆရာမတွေရဲ့ သင်ခန်းစာပေးခြင်းခံရတာ နှံကောင်အတွက် ခံပြင်းမိသလိုပဲ။ ဘာပဲဖြစ်ဖြစ် ဒီပုံပြင်ကလည်း အခက်အခဲတစ်ခုအတွက် ကြိုတင်ပြင်ဆင်ထားဖို့ သင်ခန်းစာပေးတာပါပဲ။ ဒါပမယ့် ဒီသင်ခန်းစာပေးဖို့ နှံကောင်ရဲ့ ဇာတ်ကွက်က ဇာတ်နာလွန်းတယ်။ လူတွေရေးတဲ့ ပုံပြင်ထဲမှာ ပုရွက်ဆိတ်ဆီ အစာသွားတောင်းတဲ့ သနားစရာ နှံကောင်ရဲ့ ဒိုင်ယာလော့ခ်တွေက ပီပြင်ခဲ့မှာပါ။ ပုံပြောသူနဲ့ နားထောင်တဲ့သူတွေက လက်ခံကြတော့ ပုရွက်ဆိတ်နဲ့ နှံကောင်လည်း ပုံပြင်ထဲမှာ အိုခေ။
ပုံပြင်(၃)
ဟိုးရှေးရှေးတုန်းက မြေခွေးတစ်ကောင်ဟာ တောထဲမှာ စပျစ်သီးတွေကို တပ်မက်စွာ စားသောက်ဖို့ ကြိုးစားခဲ့ဖူးပါသတဲ့။ ဒီကနေပဲ ငြင်းခုန်မှုကို စချင်တယ်ဗျာ။ ရိုးရိုးလေးပါပဲ။ စပျစ်သီးဆိုတဲ့ အသီးကို မြေခွေးမပြောနဲ့ ကျွန်တော်တောင်မကြိုက်ဖူး။ မြေခွေးလို အသားစားတဲ့သတ္တ၀ါ (Carnivore) က ဘာအကြောင်းကြောင့်များ စပျစ်သီးစားဖို့ idea ရတာပါလိမ့်။ ပုံပြင်ထဲမှာတော့ စပျစ်သီးတွေက စားချင့်စဖွယ်သီးနေပြီး အခိုင်လိုက်အပင်ပေါ်ကနေ ညွှတ်ကျနေပါသတဲ့။ အဲဒီလောက်လေးနဲ့ အသားစားတဲ့သတ္တ၀ါတစ်ကောင်ကို စပျစ်သီးတွေက ဆွဲဆောင်နိုင်ခဲ့တယ်ပေါ့။ ပုံပြင်ထဲက မြေခွေးရဲ့ အာသီသကလည်း မသေးပါဘူး။ စပျစ်သီးစားဖို့အတွက် သူတော်တော်ကြိုးစားခဲ့တာပါ။ အကြိမ်ကြိမ်မှ အကြိမ်ကြိမ်ပဲ။ ပုံပြင်ထဲမှာ ရေတွက်ပြတဲ့ ကိန်းဂဏန်းတွေအရဆို သူတော်တော်လေး အလှမ်းမီဖို့ အားစိုက်ခဲ့ရပါတယ်။ အချိန်အတော်ကြာ အားစိုက်ခဲ့ပြီး မောပန်းပေမယ့် သူလိုချင်တဲ့ စပျစ်သီးကို မရတော့ စပျစ်သီးတွေက ချဉ်ပါတယ်ဆိုပြီး ထွက်သွားရောတဲ့။ အစကတည်းက ချဉ်မှန်းသိလိုက်ပါတော့လားလို့ မြေခွေးကို အပြစ်တင်ချင်သလို စပျစ်သီးမှာ အချိန်မဖြုန်းဘဲ ကိုယ်စားဖို့ ကိုယ့်အစာအတွက် အမဲလိုက်ပါတော့လားလို့ ပုံပြင် အပြင်ကနေ ကျွန်တော်ပြောနေမိပါတယ်။ ကျွန်တော့်ထက်ရှေးကျတဲ့ ပုံပြင်ထဲက မြေခွေးကတော့ ပုံပြောသူရဲ့ အသုံးချမှုကို ခံရပြီး သင်ခန်းစာပေးဖို့ ဇာတ်ကောင်အဖြစ် မှတ်တမ်းဝင်သွားပါတယ်။ ကျွန်တော်ဘယ်လောက်ပဲ ငြင်းခုန်ပေမယ့် အ၀ါကဒ်ထိပြီးတဲ့ အားကစားသမားတစ်ယောက်က ဒိုင်ကို ပြန်ပြောနေသလို ဘောင်မ၀င်တော့ ဒီပုံပြင်ထဲက မြေခွေးနဲ့ စပျစ်သီးကလည်း အိုခေ။
ပုံပြင်(၄)
ဟိုးရှေးရှေးတုန်းက ၀ံပုလွေတစ်ကောင်ဟာ သိုးသားစားချင်လို့ သိုးရေခြုံပြီး ဟန်ဆောင်ဖူးပါသတဲ့။
ကျွန်တော်သဘောမကျတာတွေကို ငြင်းခုန်မှုလို့ ခေါင်းစဉ်တပ်ပြီး စပြောပြီဗျာ။ ရိုးရိုးလေးပါပဲ။ ကျွန်တော်က ဒီထဲမှာ ဇာတ်နာတဲ့ ၀ံပုလွေနေရာကနေ ပြောမှာပါ။ ကျွန်တော် သိုးတွေကိုဖမ်းစားတဲ့ ၀ံပုလွေနေရာကိုဝင်ကြည့်တယ်။ ကျွန်တော့်အစာအတွက် ကျွန်တော်ရှာစားတယ်ဗျာ။ ဒါကို ရက်စက်တယ်လို့ပြောလို့မရဘူး။ သိုးအုပ်ကိုစောင့်တဲ့ သိုးကျောင်းသားကသာ မပါးနပ်တာ။ တာဝန်မကျေတာ။ သတ္တ၀ါတိုင်းက သူတို့ရဲ့အစာကို သူတို့ ရှာစားတာ သဘာဝပါပဲ။ ဒါပေမယ့် ကျွန်တော့်လို ၀ံပုလွေတွေကျတော့ ဘယ်တော့မှ မျက်နှာကောင်းမရဘူး။ ဇီးကွက်တွေလို မျက်လုံးပြူးပြူးနဲ့ ညမှအစာရှာထွက်တဲ့ အကောင်တွေကျတော့ လူတွေက လာဘ်ကောင်ဆိုပြီး အိမ်တွေမှာ နေရာပေးကြတယ်။ သတ္တ၀ါအချင်းချင်း ခွဲခြားတာလေ။ ကျွန်တော့်လို ၀ံပုလွေတစ်ကောင်က အသားစားရဖို့ တောထဲမှာ စိတ်ကြိုက်အမဲလိုက်နိုင်ပေမယ့် ပုံပြောသူရဲ့ စိတ်တိုင်းကျ လူနဲ့ ပတ်သက်ခဲ့ရတယ်။ စဉ်းစားကြည့်ဗျာ သိုးတစ်ကောင်စားရဖို့ ကျွန်တော်က သိုးရေခြုံရသေးသတဲ့။ တောထဲမှာ အမဲလိုက်ရင် ဘာအရေမှခြုံစရာမလိုဘူး။ စိတ်ကြိုက် ကိုက်သတ်စားရုံပဲ။ ခုတော့ သင်ခန်းစာပေးတဲ့ ပုံပြင်တစ်ခုမှာ ကျွန်တော်ဟာ ကျွန်တော်စားမယ့် သားကောင်ရဲ့ အရေကို ခြုံခဲ့ရတယ်။ သိုးဖမ်းတာပါပဲဗျာ အဲလောက်တောင် သတ္တိနည်းဖို့မလိုပါဘူး။ ကျားဖမ်းမယ်ဆိုရင်တော့ သိုးရေခြုံပြီး ဟန်ဆောင်ရင် ဟန်ဆောင်မှာပေါ့ဗျာ။ ပုံပြင်ထဲမှာ ကျွန်တော်တို့လို အင်မတန်လျင်မြန်တဲ့ ၀ံပုလွေတစ်ကောင်က သိုးကျောင်းသားရဲ့ အလွယ်တကူပဲ ကြိုးကွင်းပစ်ဖမ်းတာ ခံရတယ်တဲ့။ သဘာဝမကျတာတွေ များနေပေမယ့် သင်ခန်းစာပေးပါတယ်။ မိတ်ဆွေဟန်ဆောင်သူဟာ ကြောက်စရာအကောင်းဆုံးရန်သူပါတဲ့။ ဒီသင်ခန်းစာပေးနိုင်ဖို့ ကျွန်တော် သိုးရေခြုံခဲ့ရတယ်။ သိုးတစ်ကောင်အဖြစ် သရုပ်ဆောင်ခဲ့ရတယ်။ သိုးရေခြုံမှ အစာရကြေးဆို ကျွန်တော်ဝံပုလွေမဖြစ်ချင်တော့ဘူး။ ဟန်ဆောင်စရာမလိုဘဲ လွတ်လွတ်လပ်လပ် ရဲရဲရင့်ရင့် အမဲလိုက်ပြီး ၀ံပုလွေတစ်ကောင်ပီပြင်ချင်တယ်။ ဒါပေမယ့်ပေါ့လေ ပုံပြင်တစ်ခုအတွက် ကျွန်တော်သိုးရေခြုံပေးခဲ့ရပြီး ဇာတ်နာပေးခဲ့ရသေးတယ်။ ပုံပြင်လေးက ဖတ်လို့ကောင်းတာမို့ ကျွန်တော်ရယ် (၀ံပုလွေ) သိုးအုပ်ကြီးရယ် ပုံပြင်ကပေးတဲ့ သင်ခန်းစာကိုလှလှပပရွတ်သွားတဲ့ သိုးကျောင်းသားလေးရယ် အားလုံးက အိုခေ။
ပုံပြင် (၅)
ဟိုးရှေးရှေးတုန်းကတဲ့ လူတစ်ယောက်က ကောင်လေးတစ်ယောက်ကို အရူးအမူးချစ်မိခဲ့ပါသတဲ့။
ယုန်နဲ့လိပ်ပုံပြင်လိုပဲ အဲဒီလူက ဇွဲရှိရှိနဲ့ အချစ်ပန်းတိုင်ကိုရောက်ဖို့ ကြိုးစားခဲ့ပါသတဲ့။ ကောင်လေးအတွက် အချစ်တွေကို ပုရွက်ဆိတ်လိုပဲ အပင်ပန်းခံပြီး သူ့ရဲ့ ရင်ထဲမှာ စုဆောင်းထားခဲ့ပါသတဲ့။ ဒါပေမယ့် သူကတော့ ကောင်လေးကို ဘယ်တော့မှ ပုံပြင်ထဲကမြေခွေးလို စပျစ်သီးချဉ်ပါတယ်လို့ မပြောပါဘူးတဲ့။ ဘယ်လိုပဲ စိတ်ပျက်စရာတွေ တွေ့တွေ့ပေါ့။ သူအမြဲတမ်း အမြတ်တနိုးချစ်နေတာမို့ပါတဲ့။ သူက သိပ်ချစ်လွန်းတော့ ကောင်လေးအပေါ် အမြဲရိုးသားခဲ့ပြီး ဘာအရေခွံမှမခြုံခဲ့ဘဲ ရိုးသားမှုကို ပီပြင်စေခဲ့သတဲ့။ သူက ၀ံပုလွေဆိုပေမယ့် ဟန်ဆောင်ပြီး သိုးတစ်ကောင်မဖြစ်ခဲ့ဘူး။ အရှိကိုအရှိအတိုင်းနဲ့ အမြဲရိုးသားခဲ့ပါသတဲ့။
အဲဒီလူဘက်က အရမ်းချစ်တတ်သလောက် ကောင်လေးကတော့ လမ်းခုလတ်မှာ အိပ်ပျော်နေတဲ့ ယုန်လေးလိုပဲတဲ့။ မသိတာလား မသိဟန်ဆောင်နေတာလား မသိနိုင်ပါဘူးတဲ့။ ပျော်ရွှင်စွာနေတတ်တဲ့ နှံကောင်လိုပဲ သူ့ဘ၀ကို ဖြတ်သန်းနေတယ်တဲ့။ ၀င်းမှည့်နေတဲ့ စပျစ်သီးခိုင်တွေလို လှပနေတဲ့ ကောင်လေးရဲ့ အလှတရားတွေကတော့ အဲဒီလူတစ်ယောက်အတွက် အချဉ်၊ အချို ခွဲခြားနိုင်ဖို့ မဟုတ်ခဲ့ပါဘူးတဲ့။ အရေခွံမခြုံခဲ့တဲ့ လူအတွက်တော့ ကောင်လေးက သိုးလေးတစ်ကောင်မဟုတ်ခဲ့ပဲ သိုးကျောင်းသားလေး ဖြစ်နေခဲ့ပါတယ်သတဲ့။ အင်း.. ဘယ်လိုပဲဖြစ်ဖြစ်ပေါ့။ လူတစ်ယောက်ကတော့ ဇာတ်နာခဲ့ရပါတယ်။ ဆန့်ကျင်ဘက်တွေ သိပ်များပေမယ့် ဒီပုံပြင်ထဲက သင်ခန်းစာပေးတဲ့ ဒိုင်ယာလောခ်လေးကိုတော့ အဲဒီလူက ပုံပြင်အဆုံးမှာ သနားစဖွယ်ရွတ်ဆိုပေးခဲ့ပါတယ်။ ဒါဟာအချစ်လား သိပ်ရန်များတယ်တဲ့။
ကဲ ပုံပြင်တော့ ပြီးသွားပြီ။ ကျွန်တော်ပြောတဲ့ ကျွန်တော့်ပုံပြင်ကိုရော ဘယ်သူတွေငြင်းကြမလဲ။ ဘယ်အချိန်မှာ စငြင်းကြမလဲ။ မယုံလည်း ပုံပြင်မို့ ပုံပြင်လိုပဲထားကြတော့မလား။ သင်ခန်းစာတော့ပေးသွားတယ်လေ။ ရိုးရိုးလေးပဲ ငြင်းခုန်လိုက်ကြရအောင်ဗျာ။ ၀ံပုလွေတွေဇာတ်သိမ်းလှမယ့် ပုံပြင်လေးတွေကိုတော့ မျှော်လင့်နေမိပါရဲ့။
နောက်လည်း အခွင့်သင့်ရင် ကျွန်တော်ခင်ဗျားတို့ကို ပုံပြင်လေးတွေ ပြောပါဦးမယ်။ ခုတော့ ဒီလောက်လေးနဲ့ပဲ ငြင်းလိုက်ကြရအောင်ဗျာ။
ပြီး။
